政情：任善寧望阿仔謙卑啲
早前捲入非禮強姦案嘅「維園阿哥」、人民力量成員任亮憲，因為證據不足而獲警方不予起訴，尋日以勝利者姿態回歸佢嘅發迹地「城市論壇」，進場後更加繞場一周同在場者握手，極之風騷，仲喺台上台下周圍點火頭。
為咗阿仔而延遲返美嘅前立法局議員任善寧，尋日亦着住人民力量嘅Ｔ恤坐足全程。佢話相信個仔經一事長一智，以後知道有啲事係唔可以「隨心所欲」，希望今次教訓鞭策個仔以後做好啲、處事謙卑啲，又話自己不時都會同個仔分析區會選舉形勢，會全力支持佢重返政壇。
曾經話要做「背後男人」替黨友助選嘅任亮憲，亦一改口風，話會積極考慮參選，但就話未揀定落邊區。佢又話每件事嘅發生都有佢寶貴之處，承諾以後會做一個「更盡責更完美更識處理事情嘅任亮憲」喎！
任善寧尋日力撐任亮憲重返「城市論壇」。