政情：肥亨唔想長女選傑青
做咗十大傑出青年選舉首席評判嘅前商務及經濟發展局局長馬時亨，尋日出席傑青接受提名記者會時呼籲大家做伯樂，提名身邊嘅青年參選。為公平計，肥亨講明自己唔會做提名人，但就醒咗評審貼士畀大家，佢話評分首先要睇候選人喺自己工作領域嘅傑出成就，同埋有冇做公益回饋社會。
問佢長女露明有冇機會當選時，佢竟然問：「邊個係露明呀？」好明顯冇將自己個女同傑青聯想埋一齊。後來佢就話就算有人提名露明，佢都會勸個女唔好，因為認為佢有大把進步空間，如果勸退無效，佢就會避席，又話︰「唔好搞到老竇咁尷尬啦！好多人都傑出過我個女。」
露明喺○九年創立德育學校JEMS，向小朋友灌輸道德教育兼且專教人點回饋社會，近年亦喺唔少慈善活動見佢蹤影，以咁嘅背景，要選傑青都合晒資格啦。
