政情：白富鴻鋪路區選撼白鴿
聽日菁英會就會舉行換屆選舉，如無意外，會由常務副主席洪為民坐正做主席。本身係燕之家老闆嘅現任主席白富鴻卸任後會有新搞作，最近做咗中西區半山社區事務促進會主席嘅佢，喺呢個月二十八號正式就職，仲喺西摩道一帶掛晒宣傳街板，為年底嘅區議會選舉做準備。
點解喺嗰度掛宣傳板？因為佢諗住出戰中西區區議會嘅衞城選區，對手會係白鴿黨現任區議員鄭麗琼。中西區衞城選區一直係白鴿黨嘅地頭，要搶攻唔係咁容易，但白富鴻話呢個世界冇容易嘅嘢，因為冇難度就冇挑戰，冇挑戰就冇火花，冇火花就冇意義，所以佢會當地區工作係一個考驗。佢又話做咗二十年社團工作都想轉變吓，趁後生乜都要試吓喎！