政情：煲呔曾Chok爆扮龍友捱炳

煲呔曾日前約咗建仔新一屆領導層去粉嶺別墅BBQ，事後仲將當日活動照貼上特首辦個facebook官方群組「上亞厘畢道」，煲呔曾一向出名親疏有別，咁做本來冇乜問題，但佢幕後班蠶蟲師爺竟然將佢一張Chok爆扮龍友嘅相貼出嚟，引嚟網友向佢連環開火。

好似網友Nicko Leung就話：「高高在山上，用幾靚幾長嘅鏡頭都睇唔到民意！」Tang Ray批評：「隻眼開隻眼閉？可能兩眼都緊閉，乜都唔理冇眼睇！」而Roy Lam仲風趣：「果然係『聾』友，對市民嘅訴求永遠聽唔到！」由於揶揄同批評實在太多，呢度不能盡錄。

喺官方群組畀人插唔算最好笑，近日竟然有網友喺facebook開咗個叫做「惡搞上亞厘畢道」嘅群組，除轉載官方照片外，最抵死係自行加咗一啲圖片說明，總之就充滿創意，令人捧腹大笑。