政情：林公公通波仔寸爆鬍鬚曾

政制及內地事務局局長「林公公」林瑞麟早前入院通波仔，喺床上都不忘接受記者訪問，休息一晚後更即時返政府總部復工，難免令外界質疑佢博表現。佢尋日喺大氣電波為自己解畫時，亦忍唔住擺同事上枱，話自己當日唔係心臟病發，「畀人抬入院嗰種」，而係好「穩定」咁入院，所以翌日復工都冇乜大不了。

撕毀選特首入場券

咦！雖然佢冇點名道姓，但心水清嘅人一聽就知佢擺明係寸爆財爺鬍鬚曾啦！喺官場眾多高官中，鬍鬚曾就係喺前年九月去美國出席G20高峰會議後，返港冇耐突然心臟病發，因心絞痛而要即時送院做手術，足足留院幾日至走得，差啲返唔到屋企過中秋，外界唔少評論更話鬍鬚曾咁樣搞一搞，簡直等同撕毀佢競逐特首嘅入場券。林公公嘅病情同佢比，又確係小巫見大巫嘅。

林公公又話佢之所以要通波仔，除因為應酬多、運動少外，某程度上可能都係同家族基因有關，事關佢家中各兄弟姐妹嘅膽固醇積聚都算多。佢血管閉塞之時，正係有議員動議取消政制局開支嘅關鍵時刻，係咪因為咁而搞到佢愈諗愈谷血呢？佢就打趣咁話，呢啲殺局言論經已聽咗十年八載，年年立法會都會夠票「處理」咗佢，所以佢唔會擔心同因而頂住道氣。泛民議員聽到佢咁囂張嘅口脗，唔知又會唔會激到谷血呢？

政制局啱啱公布，建議修改立法會條例，訂明立法會嘅空缺，將由上次選舉結果中最高票落選人頂上，以防止議員再搞「公投」。病愈嘅林公公近日周圍力sell新建議，副局長黃靜文尋日更加深入虎穴到「惡人谷」，出席預計肯定會被市民議員圍剿嘅「城市論壇」。單刀赴會嘅佢坦言未驚過，論壇進行期間仲好似林公公上身咁，表現得頗為勇猛，不時同議員駁火添。