政情：「僭建聯」新秀衰唔識鬧人
尋日係周末，近期畀僭建問題困擾、畀人改名「僭建聯」嘅建仔都暫時放低僭建煩惱，三十多人入咗特首嘅粉嶺別墅BBQ，建仔啱啱改選，新領導多咗唔少新面孔，不過煲呔曾嘅反應就好搞笑。
話說建仔主席譚耀宗介紹新領導層成員畀煲呔認識時，據引述，煲呔曾兜口兜面話好多都唔認得，佢咁直白話唔識人，搞到啲新人都好冇癮，事關煲呔曾跟住講咗句「政圈內經常鬧佢嘅人就會清楚記得」，咁講即係對佢好啲都唔得啫。
燒嘢食之餘，佢哋主要談風花雪月，大家仲無聊到講起附近嘅高爾夫球場，煲呔曾話以前經常有高球入別墅內，搞到佢要幫手執波，後來啲樹木長大咗，就幫手擋緊啲波。
粉嶺別墅作為特區政府嘅後欄，如果經常被高球入侵，等於後欄受襲，都咪話唔影響風水，難怪政府行衰運，乜嘢政策出台都唔得靈囉！