政情：搞搞政：焗拆僭建潘潔發晦氣
僭建風暴狂吹下，高官議員人人自危，環境局副局長潘潔位於大埔嘅豪華村屋被揭非法僭建，佢事後都知衰，好快搵裝修工人搭棚拆卸，不過，官場同輿論嘅壓力似乎令佢脾氣唔多好，日前佢同外傭去買餸，畀記者撞到正，順帶問佢間屋嘅手尾搞掂未，潘潔竟然好晦氣咁話：「咁你係唔係想幫手拆吖？」
堂堂高官畀人捉到僭建已經夠醜喇，點知呢頭向公眾話自己有責任，嗰頭就向記者寸嘴發晦氣，咁嘅心胸氣度，真係唔適合做高官噃！
不過，幾煩都好，潘潔都貫徹民以食為天嘅原則，尋日趁周末帶埋家傭去大埔墟市政街市買餸，見佢買咗啲紅蘿蔔同瘦肉，好明顯係想煲靚湯，都好嘅，降下火都要嘅！不過，佢個家傭除咗孭住個環保袋外，手上仲拎住一袋二袋以膠袋盛載嘅嘢，睇落相當唔環保，潘潔作為環境局副局長，好應該要求家傭環保啲喎。
設計圖片