政情：富貴黨三巨頭發叔泯恩仇
各大政黨都布重兵參與年底嘅區議會選舉，富貴黨經過上次立會選舉重創同分裂後，視今次區選為重新上路嘅翻身之戰，近期連環喺大埔同上水開設辦事處，下星期更會喺將軍澳以「自由之友」名義開辦事處，尋日富貴黨三巨頭劉健儀、田北俊、周梁淑怡都去咗上水主持辦事處開幕，到場嘉賓就有新界王劉皇發，政壇冇永遠嘅敵人，由此可見一斑。
○八年立法會選舉後，同該黨擘面、仲退埋黨嘅發叔之後同富貴黨分裂出去嘅經濟動力行得好埋，點知今次富貴黨大力開拓地方勢力，佢又畀面出席，以前嘅恩怨唔通好似粉筆字抹咗？
早前已經有傳聞，話為咗未來發展，田少正積極同鄉事派修好，希望鄉事票繼續支持佢，尋日發叔同鄉紳畀面撐場，足證田少嘅箍煲行動相當成功，今屆區選睇怕有戲睇囉！
發叔（右二）畀面出席富貴黨嘅活動，幾年前嘅恩怨好似過晒氣咁。