政情：維園阿哥開壇洗污氣

維園阿哥任亮憲捲入強姦同非禮疑案之後，日前獲警方不予起訴，甩身嘅維園阿哥顯得好興奮，互聯網上都有好多人討論佢單糾紛，呢頭鬆一鬆，維園阿哥嗰頭已傳出好多大計，仲將今日《城市論壇》視為佢復出嘅頭炮，自從惹上呢單桃色糾紛後，維園阿哥就好似從佢嘅發迹地消失咗，變相坐咗《城市論壇》監，今次特登揀喺論壇復出，唔通想話畀人聽「一切由維園開始」？

《城市論壇》今日嘅論題好惹火，政府日前就立法議員辭職後遞補機制提出新建議，論壇主辦方面都邀請咗官員、政黨代表參與討論，其中不乏惹火人物，政黨方面就有建仔嘅劉江華、人民力量嘅黃毓民，再加埋台下嘅維園阿哥，代表政府嘅政制及內地事務局副局長黃靜文真係幾把口都唔掂，參加者或者預備定個耳塞會舒服啲。

呢邊廂嘅維園阿哥計劃重新上路，坊間對佢呢單桃色糾紛就繼續大噴口水花，其中又以互聯網嘅討論最熱烈，有網民話，佢單強姦糾紛雖然甩咗，但佢嘅行為已經成為從政者嘅一大污點，仲好老實咁話，佢嘅政治前途已經蒙上污點，甚至玩完！ 認為佢以後唔應該太高調，仲話佢嘅污點可能令到同伴好不安。

網民寸爆勸「戒為食」

亦有網民勸喻維園阿哥要「戒為食」，意思即係唔好太濫，同女仔保持距離好啲。從網上粉絲興奮到不停貼文、搞到要洗版嘅情況嚟睇，維園阿哥想走低調路線嘅機會真係唔大。部分網民亦在網上圍插案件女事主A小姐，有啲人嘅用詞仲相當不雅，睇嚟，網民對呢宗桃色糾紛嘅關注有排未落幕。