4000萬夠做印度土皇帝

【本報訊】四千多萬元彩金在香港買入一個豪宅單位後可能已經用去大半，但在南亞印度，同樣的四千萬港元又是怎樣的概念？「四千幾萬港紙，喺印度郊區唔係講緊起幾多層樓，喺講緊買幾多公頃嘅地。具體嚟講，就係起碼買到五十個香港政府大球場，又或者四分一個香港島嘅土地。若果用打跛腳嘅角度睇，就係四代都唔使做嘢，夠錢請幾十個保鏢、工人同司機！」同屬印度裔的本港藝人喬寶寶昨如是說。

原來喬寶寶是億元六合彩頭獎幸運兒SINGH就讀香港嘉道理爵士學校時的中學師兄，兩人雖不認識，但喬亦有聽聞阿SINGH此人，同樣為他的幸運而開心，「呢筆錢夠喺當地（印度）做大富豪、土皇帝o架啦，以兌換率一比六計算，平均一個村民月薪千五蚊港紙，阿SINGH佢可以請好多工人、保鏢。」但對於同鄉準備返印度，喬寄語謹慎為上，因為這筆橫財可以改變數代人一生。

喬寶寶：小心遭標參

喬寶寶說：「如果家族本身喺當地有錢就好啲囉，但係依家佢突然間有咁大筆錢，唔排除會引起好多人有非分之想，去謀佢啲錢，又或者有不法之徒標佢親友參，再勒索贖金，呢啲嘢過去喺印度都發生過，香港都有呢啲情況啦，所以都係小心啲好。」

SINGH兒時好友JIMMY昨接受記者查詢時說，SINGH的家鄉機場有部分人員會留難帶有大批禮品回鄉者，曾經發生有人攜帶大批錢返鄉時失竊，「隨時一出機場就冇咗，我哋帶電器返去，啲官員都要問長問短！」忠告阿SINGH加倍小心。