政情：金利豐唔吼米蘭站Prada
金利豐金融（前稱黃金集團）成功借殼上市，CEO朱李月華自然人逢喜事精神爽，尋日喺佢哋嘅股東會後搵朱生朱太影張靚相，話說朱太見到仔仔Kingston朱俊浩行過office門口，即刻拿拿聲叫住Kingston齊齊影相。
其實，記者之前都搵過呢位太子爺做訪問，但遭到公司婉拒，理由好似話佢依家仲有好多嘢學，唔方便曝光，仲聽講太子爺喺家族公司絕冇特別優待，雖然掛住經理職銜，但仍然冇房坐。
近期好多阿太鍾意幫襯嘅米蘭站，雖然近排成為「超購王」，但係就未能夠獲得朱太垂青，朱太話米蘭站嘅集資額細，佢冇認購，亦未幫襯過，但就覺得佢哋嘅經營模式幾成功。可能朱太對消費品股嘅興趣唔大，所以都冇打算認購將會喺香港上市嘅Prada。
雖然朱太冇認購米蘭站，但就讚佢哋嘅經營模式幾成功。