政情：大狀黨淪亂撞黨惹建制派狙擊

政府輸咗港珠澳大橋環評報告單官司，死要面嘅煲呔曾前日就喺立法會答問大會上發爛渣，叫市民深思政黨、政客借環保之名，用法律程序阻撓基建發展，矛頭直指盛傳喺官司背後發功嘅「大狀黨」公文袋。建制派保皇心切，喺尋日立法會內務委員會特別會議上連消帶打，製造機會畀政府反擊，仲喪鬧「大狀黨」變「亂撞黨」。

袋巾傑噏錯環評續死撐

建仔主席譚耀宗先開政務司司長唐唐玩笑，話唐唐好擔心港珠澳大橋變「珠澳大橋，條條fing」，仲質問究竟係咪好似公文袋袋巾傑前日所言，政府曾收過要為環評做基線評估嘅提醒呢？

講嘢甩轆見稱嘅唐唐突然好肯定話，政府的確冇收過有關意見，袋巾傑見狀死撐，強調環評條例立咗法十幾年，政府不知做過幾多次基線評估，但唐唐則指袋巾傑理解錯誤。

跟住建仔副主席兼行政會議成員劉江華乘勝狙擊，指摘袋巾傑用大狀口脗盤問唐唐，仲話袋巾傑嘅黨友湯家驊喺僭建問題上連判詞都記錯，身為大狀有咁嘅水準實屬可惜，真係大狀黨變「亂撞黨」。前日為寓所僭建道歉嘅湯家驊，即時將罪名攬上身，大呼係自己嘅錯，唔關黨友事。到咗呢刻，建仔見政府反擊取得小勝，於是鳴金收兵，呢場大龍鳳先至落幕。