政情：葉劉返母校淚眼憶亡夫

三名疑似特首候選人尋日分別有所動作，但另一黑馬人選、新民黨主席葉劉淑儀就遲咗一步，今晚會喺電視節目出現。葉劉接受有線電視節目《我的父親母親》訪問，同節目主持陳啟泰一齊重返母校聖士提反女子中學，期間憶述父母、丈夫同細佬相繼離世嘅跌宕人生，喺談及丈夫因肺癌離世、同囡囡榮欣頓失依靠嘅經歷時，更忍唔住眼泛淚光。

葉劉喺訪問中自爆到三十一歲先至初戀，差啲變咗做剩女，後來結婚生咗個女，喺官場又步步高陞，點知父母同丈夫又先後離開自己，一次又一次為摯親辦喪事，其中最難忘係要向囡囡親述丈夫離世嘅事實。

原來丈夫患病入院後，葉劉從未帶過囡囡去探病，其後囡囡知道失去摯親，就突然變得好沉默寡言，加上佢工作太忙，令到兩母女嘅關係一度變差。直至佢辭職離開政府，重新過番啲正常嘅家庭生活，雙方關係先變番好。