政情：搞搞政：鄉紳圍攻林偉強一身蟻
新界鄉議局副主席林偉強早前競逐連任坪洲鄉委會主席落敗，日前又因該局新大樓工程甩漏問題而成為眾矢之的，尋日又被揭發霸佔官地，而喺鄉議局換屆在即，唔滿意佢表現嘅鄉紳更借勢攻擊，仲計劃搵人挑戰佢嘅副主席個位。睇嚟佢真係一身蟻！
早前曾傳出新任坪洲鄉委會主席黃漢權同荃灣鄉委會主席鍾偉平有意挑戰林偉強，但有鄉議局消息人士話，目前林偉強最少有十七票喺手，同鍾偉平旗鼓相當，所以形勢只係五五波，選情充滿變數。據悉，黃漢權已決定放棄參選，可能知道自己未必撼得贏林偉強，與其分散票源，不如全力支持鍾偉平，以增加勝算。至於早前傳出有意挑戰另一副主席張學明嘅沙田鄉委會主席莫錦貴，亦都打消參選念頭，全力支持張學明競逐連任。
