短打長擊：夕陽政府氣魄更壯

調查指，煲呔曾的民望尚在五十分僅僅合格水準，對「視民望如浮雲」嘅佢嚟講肯定飲得杯落。俗語說，凡事要三思，但比三思更重要的是三思而行。煲呔曾治港一味吹水，「六大產業」、「十大基建」多淪為假大空，到如今夕陽西下，窮人冇減少，社會冇和諧，而佢自己就準備散Band走天涯，吹着口哨含着蘆草，做個風騷快活人。

財爺鬍鬚曾的民望更是「飛流直下三千尺」，只得四十五點四分，一沉不起，創任內新低。香港明明是福地，庫房水浸，做財爺不需為財赤傷神，不必為開源添愁，理應瀟瀟灑灑，可惜佢面對高通脹高樓價完全無符，基層市民叫苦連天，鄰埠澳門已一再派錢紓民困，佢嗰六千蚊嘅「應急錢」卻遲遲都未公布點樣派！無能至此，有乜計市民唔怨爆？

煲呔曾之主要問責官員，唔係五勞七傷，就係Hea住施政，無一樣經過深思熟慮。最低工資一鑊泡，擴大徵膠袋稅又再擾民，藍天白雲唔知去咗邊……張建宗、邱騰華、曾德成、周一鑊、林公公……真係一蟹不如一蟹，你話咁嘅夕陽政府仲會帶畀百姓幾多餘暉？

有人說，環境給人製造恐懼，是因為人有動物性；人給人製造恐懼，是因為人有人性；人性有時比動物性更恐怖，因為懂得自我感覺。像杜甫的「國破山河在」可改成「國在山河破」，對於心中沒有百姓的掌權者，「山河破」又如何？只要「國在」，還不是可以興高采烈，為了面子大事鋪張，社會不也是和諧麼？斜陽裏，氣魄不是更壯麼？