SUN角度：職員戒心重四圍巡查

雖然無牌工廈K場表明只招待會員，但仍吸引不少街客光顧。惟有人疑「身有屎」，凡事均小心翼翼，除在場內及大門外安裝閉路電視外，又不時派員四圍巡查，查問顧客。

記者曾佯裝顧客致電查詢消費詳情，起初職員極具戒心，表明只招待會員，又細問記者從哪裏得到消息。當記者詢問非會員可否入內消遣時，她即「講一套做一套」，「咁你上到嚟入會咪得囉！填張表又唔使收費，到時你上嚟話入會就得，入咗會就可以玩啦！」

惟負責人見有陌生顧客「幫襯」即表現謹慎，除上前「問候」，又打探來者意圖及職業。全面「起底」後，才放下戒心。其後他自我介紹說：「我做傳銷生意，成日租唔到場搞活動，所以索性喺工廠大廈入面租個單位，順便提供地方畀會員『落腳』，之後就整多個地方畀會員唱吓歌。我哋唔做街客，只係畀會員嚟玩，入嚟玩要有熟人介紹！不過，會員又可以帶啲朋友嚟玩，然後再做會員！」期間，負責人發現有可疑的非會員，即煞有介事上前「閒談」，最後更請他們離開。