啱啱喺上月攞咗香港金像獎影后嘅劉嘉玲,佢代言嘅皇朝傢俬尋日有個簽約儀式,但大家唔好誤會,皇朝傢俬唔係同劉嘉玲簽約,而係簽約喺江西省買地起生產基地。
劉嘉玲已經做咗佢哋嘅代言人一段時間,但要每年續約,CEO馬明輝笑住話希望劉嘉玲續約時唔好加價喎!
皇朝嘅生意係產銷家具,依家人仔繼續升,馬總係咪好大壓力呢?點知佢話唔係,因為佢哋主要做內銷,人仔升值反而有利,仲可以派多啲息添!不過佢有個做電子出口嘅朋友就牙痛咁聲,人仔升值致被老外係咁壓價。
馬明輝希望佢哋嘅代言人劉嘉玲唔好加價。