政情：搞搞政：葉劉吹雞逼撤競爭法

競爭法惹起極大爭議，工商界除咗日夜鬧爆外，更喺草案委員會上採取「拉布」手段，務求拖得就拖。近日行動將會升級，事關新民黨主席葉劉淑儀尋日宣布計劃要求政府撤回競爭法草案，仲話會有信心富貴黨同經濟動力會支持。咁擺明係糾眾逼政府啦！不過，唔少黨派都對葉劉呢個「激進」做法不置可否，有議員更質疑佢咁做似係一個政治化舉措。

葉劉話擔心競爭法對中小企嘅影響仲大過最低工資，所以計劃喺草案委員會上提出動議，要求政府撤回草案，仲話反正草案嘅審議工作處於膠着狀態，撤回草案對大家都好。

不過，富貴黨主席劉健儀話佢哋雖然唔會反對，但直言呢個舉措意義唔大，更形容係「意識形態多於實際」，最理想係政府讓步，將法例變成反壟斷法，咁就對中小企有利。咁講法似乎同葉劉唔多夾嘴形噃！經濟動力嘅林健鋒就話要視乎政府未來會就條例作出乜嘢讓步，至決定支唔支持葉劉。