政情：煲呔曾公文袋演大龍鳳
尋日煲呔曾出席立法會答問會時一開波就向公文袋開火，唔點名指該黨喺大型基建項目快將展開之際，借環保同保育之名，利用法律程序阻撓工程，目的係達到一己嘅政治目的，亦令到七十幾項工程因而停工。
之後煲呔曾喺質詢環節又重複呢個論點幾次，搞到公文袋嘅議員發晒脾氣，佢哋嘅黨魁袋巾傑即時質問煲呔曾乜嘢叫做濫用司法程序，又話立法會已一再警告政府為港珠澳大橋工程所做嘅環評報告隨時違法，只係煲呔曾一直聽唔入耳，結果搞出今日嘅局面，仲質問煲呔曾係唔係想叫人大釋法，破壞香港司法獨立。
雙方十足街市潑婦罵街，認真無聊。講嚟講去，呢場話唔定係煲呔曾同公文袋上演嘅大龍鳳啫，相信市民會明白嘅！