政情：民協被網上商店拖落水
搞咗幾年社會企業都仲係蝕本嘅民協，最近居然做出名堂，但唔係客似雲來，而係佢哋得個名有人識，仲畀人用埋添！
網上最近有間舖頭叫「民協××店」，單睇個名，難免令人聯想到同簡稱民協嘅香港民主民生協進會有關。有市民幫襯完呢間網上店，對相關服務有意見，就打咗去向民協投訴，亦有人打去問民協係咪有貨賣，搞到佢哋要澄清。
民協搵人打過電話去呢間舖頭放蛇，問佢哋係咪同民協有關，而對方亦答得好小心，冇直接話同民協有任何關係。由於民協同旗下嘅民社中心並冇做冷氣生意，好難告對方侵權或盜用商標，再者人哋又冇講明同佢哋有關係，因此亦唔涉及欺詐，最後惟有訴諸傳媒，澄清佢哋並冇網上購物服務。