政情：西九新CEO內定人選？
西九管理局預計會喺月底就懸空多月嘅行政總裁人選拍板，其中接任大熱前倫敦南岸藝術中心行政總裁邁克爾．林奇（Michael Lynch），下個月一號就會飛嚟香港參與西九管理局活動，同本港嘅藝術行政人員交流。月底拍板請人，一號就返工同對口單位交流。使唔使咁急？擔唔擔心會畀人質疑內定人選呀？原來當中係有段古嘅！
西九表演藝術行政總監茹國烈透露，該局同香港藝術行政人員協會，喺下月一至三號合辦咗個專畀藝術界參與嘅講座同交流活動，分別喺北京、美國、英國同澳洲，邀請咗六名嘉賓主講，當中包括林奇。佢強調有關活動早喺一年前籌劃，當時仲未知前行政總裁謝卓飛會借病辭職，因此同林奇盛傳獲選完全無關。