政情：新西議員民望多插水

近日政壇刮起僭建風暴，唔知係咪純粹巧合，多名肇事立法會議員都係嚟自新界西，包括建仔張學明、街工梁耀忠同工聯會王國興。最邪嘅係，一項喺僭建風暴爆發前進行嘅民調，亦顯示多名新西議員民望齊聲暴跌，真係禍不單行。

香港研究協會尋日發表立法會議員民望調查，喺四個立法會直選區域中，其中三區嘅議員民望都升多跌少，唯獨新界西嘅八名議員僅得兩人民望上升，六人下跌，其中五人跌幅更相當顯著。

除咗先後爆出僭建醜聞嘅張學明、梁耀忠同王國興，因為有多名黨員被揭違規僭建而畀人笑稱做「僭建聯」嘅建仔主席譚耀宗，仲有白鴿黨主席何俊仁同職工盟李卓人，亦難逃民望下跌嘅厄運。其中最先被揭僭建嘅張學明，民望更跌至唔合格水平，喺新西八名議員中包尾。

不過，有關調查係喺呢個月三至十二號進行嘅，當時梁耀忠同王國興都未被揭發涉嫌僭建，張學明單嘢亦喺十一號至曝光，影響應該唔會咁快浮現。