政情：立法會難封殺議員掟嘢

立法會上個禮拜通過修改《議事規則》，授權事務委員會主席都有權驅趕行為不檢嘅議員離場，但對於禁止議員攜帶大型標語或抗議道具進入議事廳，最後就虎頭蛇尾，草草收工。

話說立法會議事規則委員會前日討論有關問題，各黨派代表都認為好難定義乜嘢標語或道具至算太大同有攻擊性，即使一刀切禁止攜帶，有人癲起上嚟要掟筆掟鞋都防佢唔到，不如等佢真係掟咗嘢先再趕佢離開。委員會最後決定唔會針對有關問題修改《議事規則》，僅建議由立法會主席向全體議員發出通告，呼籲大家唔好再亂掟嘢算數。

有泛民主派委員指出，建制派唔敢修例禁止攜帶標語道具，皆因佢哋都經常咁做博出位，例如工聯會議員王國興，就成日帶埋啲假手假腳同公屋模型入議事廳，仲誇張過泛民啲香蕉膠樽同假棺材，一刀切禁晒對大家都冇好處，不如隻眼開雙眼閉，將個波交番畀立法會主席好過。