政情：搞搞政：邱騰華快閃累Eva受靶

有議員尋日喺立法會提出質詢，追問港珠澳大橋環評報告被法院推翻，對沙中線工程嘅影響。由於兩項工程都係運輸項目，政府安排咗運輸及房屋局局長Eva鄭汝樺作答。不過班議員問問吓，又要求政府交代埋仲有幾多基建工程被迫叫停，搞到Eva口啞啞，坦言「呢個問題最好叫環境局局長答」。喺議員再三追迫下，佢最終承認有多達七十幾項工程受影響，但詳情要稍後以書面補充。

其實，立法會尋日首條質詢正係由環境局局長邱騰華作答，之後就到港珠澳大橋環評問題，但佢明知後者涉及自己嘅政策範疇，甚至主要係因佢做漏嘢而起，佢都冇主動留低幫Eva解圍，一答完自己條問題就快閃走人。

有人懷疑邱騰華走得咁急，係同佢嘅副局長潘潔被揭違規僭建有關，擔心留多幾分鐘都可能畀議員或傳媒搵到位留難佢。邱騰華鍾意自己攞彩做騷，啲豬頭骨就留晒畀啲下屬啃，喺副局政助圈子早已出晒名。依家副手有難，佢一句口都冇幫過，又卸鑊畀其他局長同事代佢孭，真係勁縮骨！