政情：區選劃界捱炳 林公公厚顏自讚

區議會換屆選舉年尾降臨，相信有心參選嘅人已經磨拳擦掌，準備埋身搏鬥。立法會尋日辯論有關今年區選選區劃界嘅決議案時，泛民主派同建制派都互指劃界益咗對方。

充滿怒火嘅民協議員KK馮檢基劈頭就話，劃界係重要而政治嘅工作，要做到獨立公正無私之餘，仲要係畀人睇得到嘅獨立公正無私，可惜每次劃界都會帶嚟政治上嘅改變。之後佢搬埋蘇屋邨嘅兄弟選區被瓜分做例子，喪鬧政制及內地事務局局長「林公公」林瑞麟有政治目的。白鴿黨議員李永達深表認同，仲加把口話選管會劃界用嘅資料都係民政事務專員提供，為咗證明佢哋係中立，佢試過叫政府公開專員畀選管會嘅資料，點知政府一口拒絕，仲唔係有不可告人嘅秘密？

泛民建制齊發炮

泛民鬧得興起，見狀嘅建仔主席譚耀宗忍唔住口，自爆佢都收唔少地區兄弟投訴，埋怨劃界益咗對家，政府次次都呃佢哋，只有衝擊，沒有好處，擺出啞子吃黃連嘅款。最後工聯會議員黃國健亦呻埋一份，費事因為佢冇加入埋怨行列，將來有兄弟輸咗就賴佢冇同政府投訴過，跟住仲語帶雙關咁話依家備一備案，將來就可以賴地硬。

畀各大陣營喪鬧，林公公按下「人肉錄音機」按鈕，重申劃界工作獨立，全部都依法辦事，唔同黨派嘅意見佢都會客觀考慮，之後好得戚咁竊笑話，各大黨都有意見同不滿，正好證實劃界工作獨立，所以各黨嘅憂慮同意見都係自然嘅。

林公公將對自己嘅讚美建築喺各黨派嘅不滿之上，簡直係阿Q上身，在座嘅泛民同建制派聽到，都唔知好嬲定好笑。