Sun世代：科學怪傑掌舵潮餅唔再老餅

傳統潮式餅食文化源遠流長，要繼承這一門生意，當然要身懷炮製各類潮式餅食絕技。而貴嶼仔潮式餅糖糕飽專門店掌舵人楊子儀（Rocky），不單學會傳統潮式餅食的百般武藝，在製餅工場內更結合物理反應理論，化身科學家反覆鑽研；又引入冷凍技術，將原本只有百多種款式的潮式餅食，幻化至二百多種，演繹出潮餅經典，弘揚箇中精髓。

爸爸自四八年起經營潮式餅食，Rocky三歲已「立志」要繼承衣鉢：「嗰時喺爸爸尖沙咀間舖食過好好味嘅花生糖，就決定大個要學識做，起碼自己有得食先啦。」他九歲時已學識做餅，十五歲學歷只有中一程度，就全職踏上做餅路。

以為「少爺兵」學師，老師傅樂於教授真傳，豈料恰好相反。原來上一代師傅思想較封閉，深怕「教識徒弟無師傅」，肯教都會「留一手」，更遑論公開絕密做餅秘方。

Rocky惟有半偷師學習，不過，他亦用誠意打動師傅們心靈：「我同佢哋講『師傅你教我啦，我學識咗，就會係一個代行者、演繹者，一路做落去，令精神不死。」如是者，令師傅們開始「肯講少少」。之後十五年，Rocky跟過五、六十個師傅，累積各人精華，總算學滿師。

聽Rocky細說製作潮式餅、糖、糕、包，有種聽科學家講解做實驗的感覺。原來，他所做的餅食，不少都是他按照別人的製成品，反覆試驗做出來：「做餅廠房內有所謂『配製權限』，有啲秘方唔畀人知，做到嗰個步驟，全部人都要行開，睇唔到只可以自己試，做番最近似嘅出嚟，一次過做十個實驗，實有得益。」為了調製一種水晶包，他帶着一隊人試驗食材間所產生的物理反應，為達至最佳效果，花足一個月時間也在所不計。

雖然Rocky只讀到中一，但他好學不倦，之後在夜校完成中五課程，平時又不斷閱讀知識性的書，學來滿腹學問，助他改進製餅的工具設計和生產流程，又引進了現代化管理理念。例如看了可口可樂如何建立王朝的書，啟發他更注重「權限」對業務和控制品質的重要，現時全公司已發展至四級「權限」，採訪當日記者亦因無「權限」，禁足其辦公室，為做餅的「內幕」保持高度機密。

成功秘訣：肯認錯

Rocky又為公司引入冷凍技術，研發全新口味食品，包括貴嶼仔冰糕和無需解凍、可直接自家烤焗的貴嶼仔雙黃蓮蓉月餅，多年間將公司餅食種類由百多種，變化成如今的二百多種。而他的二十二歲長子亦遺傳做餅天資，早前更已暫停學業，為接棒做準備。做餅秘技不便公開，Rocky倒樂於分享成功秘訣：「勤力、睇多啲書係必然，但最緊要係肯認錯，不恥下問，肯去認錯再請教人先會有進步，成日覺得自己無錯、啱晒，就無嘢需要學啦！」

Rocky Yeung's Profile

現　　職：貴嶼仔潮式餅糖糕飽專門店董事

社會公職：香港潮州商會會員、香港發明協會專業會員、香港紙藝學會會員、香港摺紙社會員、啟德扶輪社—國際扶輪3450區社員

發明項目：簡約禮盒、連環扣禮盒、創智名片、雕塑鋁片、《戰國七雄》中國象棋

榮獲資格：2008台灣傑出發明博士、發明博士獎章

榮譽稱號：「建國六十周年百名優秀發明家」