政情：搞搞政：蘇錦樑忽然升呢勁無奈

劉吳惠蘭因病辭職已個幾月，但政府仲未公布邊個接任商務及經濟發展局局長，有傳政府可能焗住畀喺任內屢爆醜聞嘅「次次選」副局長蘇錦樑坐正，仲盛傳會喺日內公布，以便佢以正印局長身份去美國出席聽日舉行嘅亞太經合組織部長級會議。但近日政界又傳嚟消息，話個別工商界人士強烈反對佢做局長，甚至有說佢個名早已交咗上北京，但中央遲遲都未批，有可能被「彈票」添！

蘇錦樑尋日到立法會工商事務委員會講解專利註冊制度問題，由政府提供嘅出席官員名單，就寫咗佢係「商務及經濟發展局局長」，冇咗「署任」兩隻字，但同場嘅另外兩名知識產權署官員，職稱就有署任字樣，唔似係手民之誤。唔通政府都預咗佢尋日正式坐正，但最後中空寶唔記得更正？

有議員問蘇錦樑當中有乜玄機，佢就邊苦笑邊答話：「關於玄機嘅問題，呢個唔係我個人決定嚟嘅，所以唔方便作答。」表現得相當無奈。