政情：阿Ron去過米蘭站掃袋
「超購王」米蘭站招股令全城瘋狂，估唔到連港交所主席阿Ron夏佳理都係米蘭站擁躉！點解咁講呢？話說阿Ron都曾經幫襯過米蘭站，送禮物畀佢親愛嘅老婆大人。
阿Ron係有米之人，使乜去買二手手袋呀？查實佢係去買新手袋至真，佢笑住話每逢過時過節，都會送禮物畀老婆，聖誕新年更加唔少得，但有時候有啲款式專門店可能賣晒，未必買到，曾經喺米蘭站買到太太嘅心頭好。
佢仲話米蘭站今次能夠擊敗一眾中外大型新股，打破本港新股認購紀錄，成為新一代超購王咁威，如果時間許可嘅話，佢都會出席米蘭站下禮拜一嘅上市儀式。
嘩！主席唔係每家新股都會抽空出席上市儀式，今次如果佢畀面出席米蘭站嘅上市儀式，肯定令米蘭站錦上添花，米蘭站主席姚君達肯定好開心！
阿Ron話或會抽空出席米蘭站嘅上市儀式。