政情：田定先拒捐關愛基金
本地慈善家田家炳一手創立嘅田家炳基金會一向樂善好施，但田家炳嘅公子田定先尋日就表明基金會無意捐款畀關愛基金。點解呢？
田定先解釋，田家炳基金會個荷包其實唔算好大，而且一向都只着重教育方面，佢唔知其他善長仁翁點睇關愛基金，但佢就覺得其實香港社會總算富裕，相比之下，內地需要幫助嘅人多好多，基金會有見及此，喺內地三十三個省市都有慈善項目，中小學甚至綜合大學都有捐錢。
仁愛堂田家炳小學早排是非纏身，例如有教職員涉及風化案、有學生公開試出貓、學校招標又出現問題，校長鄔淑賢話事後已經進行一連串改革，相信將來唔會再有類似情況發生。同場嘅田定先亦話世事冇完美，輸咗唔緊要，只要唔好輸埋個教訓就可以嘞！
田定先（右）講明唔會捐款畀關愛基金，因為覺得內地嘅人更需要幫助。左為仁愛堂田家炳小學校長鄔淑賢。