政情：鬍鬚曾玩殘入境處員工

財爺鬍鬚曾早前份史上最廢嘅預算案，搞到天怒人怨，事隔七日後跪低，宣布向市民派發六千蚊，就算早前喺立法會低票通過修訂預算案後，但點派法、幾時派仍然都未知，但知道嘅係鬍鬚曾冇好帶挈。

四個工會發信投訴

近年因為處理居港權問題、徵收外傭稅、核實超齡子女來港安排等問題做到有氣冇碇抖嘅入境處人員，終於忍唔住要爆。入境事務處四個工會之前發信畀鬍鬚曾，投訴政府有啲乜嘢就「莫名其妙於第一時間命令部隊同事負責」。

好似向市民派六千蚊咁，一時話新移民冇，一時又話用關愛基金派畀新移民，不過就要同入境處申請，搞到入境處嘅查詢多到爆晒燈。例如電話查詢，就由公布前平均每日六千幾宗增加至八千幾宗，增幅達兩成半；有關可唔可以直接攞錢嘅居留權問題查詢，更由平均每日二百宗急增兩倍幾，至到六百七十幾宗。

入境處人手不足嘅程度已經可以講係「十個煲得六個蓋」，入境處呢鋪真係畀鬍鬚曾玩殘。班手足做到金睛火眼，睇怕入境處處長陳國基冇理由唔知道，亦理應好體恤班手足嘅苦況。既然鬍鬚曾夾硬將啲嘢塞畀佢哋做，咁可以點解決？當然係要反擊，要鬍鬚曾放多啲資源畀入境處啦！又睇吓陳國基之後有乜板斧。