陳振聰私生女曝光

【記者林靄雲報道】備受爭產官司困擾的陳振聰，被指除龔如心和妻子譚妙清外，身邊還有紅顏知己，最撲朔迷離的是和他親暱遊英倫的「聰女郎」。對於這名神秘女郎，陳振聰昨接受本報專訪親口解開她身世之謎，其實「佢係我個女」，原來現年二十九歲、修讀博士的倫培珍是陳振聰私生女。陳坦認女兒是他與初戀女友所生，當年他清貧無力撫養女兒，惟有交給女友親戚照顧，直至十多年前才父女相認。他更開心稱女兒明年結婚，將榮升外父。

洋名Polly的倫培珍，近年穿梭於英國和香港，曾被爆出在兩地住豪宅及坐名車，又與陳振聰把臂同遊英國，甚至被暗示是遭陳振聰「包起」的情人，而陳一直未有公開澄清，令她身份更加神秘。

初戀女友所生

與譚妙清育有兩子一女的陳振聰，昨終開腔打破謠言，承認還有一名親生女兒，即該名常被傳媒追蹤拍攝的女子倫培珍是他的長女。說起長女的身世，陳振聰自爆是他二十多歲時與初戀女友的結晶品，當時他還未認識譚妙清，「三十年前我好細個，當時都幾曳，同初戀情人拍拖，佢有咗無同我講，到我知道時，佢都有咗幾個月啦，咁就決定生出來，佢嗰邊有親戚話屋企都有細路仔，可以幫手照顧埋，咁一生咗出來就交咗畀佢哋。」

陳坦言，當年年少無知加上經濟環境欠佳，沒能力盡父親責任，女兒跟隨「榮叔」和「蝶姨」一家生活，期間曾移居澳門多年，直至九十年代他才與女兒相認，「有親戚做中間人聯絡，我哋先相認番，咁我嗰時環境好咗，梗係要盡力照顧佢。我送囡囡去英國讀書，佢讀得好好，係皇家學院（King's College）數學系碩士，依家就响倫敦政治經濟學院讀數學系博士。」

雖然父女分隔兩地，但兩人經常講電話和見面，關係非常深厚。陳振聰指家人十多年前已知悉私生女的存在，長女亦有回港出席家庭聚會，唯獨妻子譚妙清採取「寧知莫見」的態度，「佢係知嘅，但唔想討論唔想提。」他又透露，女兒稍後將會改回跟他姓陳。

大讚未來女婿

說起長女，陳振聰盡顯父愛，總笑得甜絲絲以囡囡相稱，暫時忘卻官司的煩惱，「囡囡同男朋友拍咗三年幾拖啦，明年會結婚，個男仔姓包，係上海人，早排佢哋先去上海見男方父母，Yibo（包的洋名）份人好好、好乖仔。」

提起未來女婿，陳振聰讚不絕口，「Yibo响英國高盛工作，我囡囡幾年前去佢公司實習時認識嘅，舊年囡囡知道我因為官司心情唔好，帶埋男朋友返香港探我，今年我媽媽肝病做手術，佢又專程返來日日去醫院。」至於女兒生母現況，陳振聰不願多談，只說數十年未有見面，「佢有自己家庭，唔係咁方便，加上我依家又咁（被刑事調查），費事人哋驚我影衰佢啦。」

倫培珍個人檔案

洋　　名：Polly

出生日期：1982年 婚姻狀況：未婚

學　　歷：童年在香港及澳門受教育

英國皇家學院數學系碩士

現正攻讀倫敦政治經濟學院數學系博士

身　　世：幼時交由生母的親戚照顧，曾移居澳門生活數年，十五歲與陳振聰相認，後負笈英國留學。