政情：搞搞政：長毛寸林公公床上搏盡

近排接連有問責官員患病，立法會政制事務委員會尋日討論促請政府檢討公布機制時，社民連「長毛」梁國雄就好慨嘆咁話，叫高官披露佢哋嘅健康狀況都冇用，事關佢哋滿口謊言。

長毛又細數過去高官嘅真假病歷，先話老董當年「腳痛」下台係假嘅，如今煲呔曾畀人衝擊後，又要人「提醒」先施施然去驗傷；而商務及經濟發展局前局長、患有腦血管瘤嘅「肥亨」馬時亨，辭職後冇耐就返新工，同時欠公眾一個交代。

接肥亨手嘅劉吳惠蘭早前因患癌辭職，長毛口快快咁話佢「好快就瓜」，喺委員會主席譚耀宗警告下，佢即時補鑊話只係指對方嘅官運玩完，算佢兜得快。但係長毛竟點名讚佢嘅「冤家」政制及內地事務局局長「林公公」林瑞麟，話佢通完波仔瞓喺床上都盡忠職守，接受記者訪問，係「政治典範」，但亦不忘寸佢高調公布病情係將成件事政治化，覺得佢好打得。