政情：懶理藥業港府官僚冇藥醫

近年內地經濟蓬勃，亦帶挈埋醫藥行業嘅發展，主力內銷藥品嘅李氏大藥廠，業績由○七年起大躍進，呢間本地藥廠喺創業初期，都經歷過好多不為人知嘅辛酸史。

大藥廠嘅CEO李小羿博士同記者講，由於研發藥品喺屬於長期嘅投資，所以佢哋早年為咗慳錢，喺安徽省合肥市嘅廠房，即使喺冬天低溫到零度以下亦唔開暖氣，寧願將慳埋嗰三萬幾蚊投入公司，可見佢哋為咗公司嘅發展，亦不惜捱凍開工。

李博士又話佢哋好努力咁經營間廠，但港府就唔多支持，除咗科學園有support外，其他政府部門就好官僚，故步自封，相關嘅配合措施投入不足。相反，內地就好支持藥物嘅研發，佢哋打算就一種肝癌藥的臨床階段申請資助，若然成功，可獲得一兩千萬元嘅資助，而且內地仲補貼埋專利申請添。佢仲話佢哋好着重社會責任，所以研發嘅新藥，主要集中喺專科或者喺較罕有嘅病，希望幫到有需要嘅病人。