政府仲未公布邊個接替劉吳惠蘭出任商務及經濟發展局局長，早前仲有傳聞話可能喺搵唔到人嘅情況下，焗住搵署任局長蘇錦樑坐正，尋日佢出席一個電台節目時，一入場就差啲跣親，對於幾時有正印局長返工，佢索性三緘其口，乜都唔講。
同樣係署任角色嘅署理廣播處長梁松泰亦有現身，問起佢點解搶咗部AM車嚟揸，佢話自己嘅政府車車牌考咗已經四、五年，仲講笑話有朝一日如果冇得撈，轉行揸政府車搵食都仲得喎。
問到佢幾時會有正印處長上任，佢即時大耍太極，話相信政府有結果嘅時候會公布。
蘇錦樑（中）尋日差啲跣親，電台高層即時出手相扶。
