政情：財險總裁以「人民」自豪
財險上市咁多年，終於首次搞傳媒開放日，邀請一班內地同香港嘅記者去佢哋喺佛山新嘅南方信息中心。
話說甫到佛山，財險董事長吳焰就同大夥人影大合照，之後就立即展開記者會。吳焰喺記者會度致詞演說同回答咗三條提問後，就匆匆離開會場，留低總裁王銀成同一眾高層繼續同傳媒交流意見。王總同傳媒食埋午餐後，就急急腳趕往機場，據講係要即日飛返北京繼續處理業務，可謂珍惜一分一秒。
點解財險高層咁行色匆匆？或許同佢哋嘅使命感有關。王總好自豪咁話，內地機構嘅名字能冠有「人民」二字，印象中只得人民銀行，但人行係內地央行，而佢哋（財險全名為中國人民財產保險）作為商業機構，就顯得難能可貴，所以佢哋要盡力回報股東同客戶，做到佢哋嘅願景「做人民滿意的保險公司」。