政情：搵十二.五遮醜唐唐越界擦鞋

關愛基金慘變「爛尾基金」，早前向財委會申請撥款時更被議員圍攻，最終僅以低票勉強通過。不過，身為基金督導委員會主席嘅政務司司長唐唐，唔知有心定無意，喺過去兩次財委會中，都因唔喺香港而未有現身面對議員質詢。龜縮兩周後，佢終於肯蒲頭，出席嚟緊周五嘅立法會內務委員會，但唔係交代關愛基金，竟然係悶到抽筋兼冇乜爭議嘅十二．五規劃。

關愛基金早前一連兩周到立法會財委會申請五十億元撥款，但唐唐第一周就去咗四川訪問而缺席會議，僅透過報章撰文，呼籲議員支持撥款。當時唔少議員已經不滿佢放飛機，不斷促請佢要喺下一次會議現身，萬料不到佢又話要趕住去美國睇囝囝嘅畢業禮，再次缺席會議，成功避過議員圍剿，事後又係透過發聲明感謝立法會通過撥款。

關愛基金狂卸膊

其實唐唐喺兩次財委會之間嘅時間，都曾喺香港出席大大小小嘅公開場合，但每次面對記者針對關愛基金嘅提問，都採取封口唔答嘅態度。即使關愛基金被踢爆籌款不足已接近一個月，佢至今仍未向公眾公開交代過。唐唐一直死撐話關愛基金係民政事務局負責嘅範疇，由該局局長曾德成出席會議先係正統。以呢個邏輯嚟睇，十二．五規劃明明就係政制及內地事務局嘅事，叫「林公公」林瑞麟嚟立法會交代咪得囉！

但佢偏偏喺本周五「主動獻身」去立會講十二．五規劃，難免有擦鞋之嫌。之不過，雖然關愛基金嘅撥款已批，但爭議性同負面新聞絲毫未減，相信屆時一眾議員都會瘋狂離題，唔會輕易放過佢。