政情：搞搞政：哪吒踩田少孤寒拒捐
弱勢政府搞乜都衰，好似搞關愛基金咁，唔單止辦事不力，又眼高手低，向商界揼心口諗住籌五十億元，點知差一大截，只得十八億元。其實大有大搞，細有細搞，好似前富貴黨成員、西貢區議員「哪吒」方國珊喺地區搞咗個迷你版關愛基金，唔聲唔聲已籌到五百幾萬元。
哪吒尋日撐住拐杖同契媽一齊入馬場，原來佢上個禮拜日母親節落區派花時差錯腳拗柴，依家仲要撐拐杖，兼睇跌打同針灸。
本來佢同富貴黨榮譽主席田北俊係師徒關係，提起佢前師傅田少講到明話唔會捐錢畀關愛基金，佢就明寸田少拒捐關愛基金做法唔好，認為應該呼籲大家都捐錢，好似佢咁窮，都一樣捐咗十萬蚊畀西貢區嘅迷你版關愛基金，仲話大孖沙、小孖沙都話唔捐就最曳。真係句句有骨喎！
設計圖片及對白