政情：許華傑未決定接象哥棒
二○一二年立法會換屆選舉，建仔嘅進出口界議員「象哥」黃定光如無意外都會退位讓賢，交棒畀新任建仔中委兼已故立法會議員許長青個仔許華傑。許華傑參選立法會已經係公開的秘密，但佢早幾日同記者講，話自己盤生意仲未上軌道，加上仔細老婆嫩，依家都尚且分身不暇，若然做咗立法會議員，私人時間肯定更少，要認真諗諗咁話。
除咗生意同屋企問題外，據許華傑自己講，香港中華出入口商會方面對於由邊個代表業界去做立法會議員仲係懸而未決，林林總總問題令佢不得不左思右想，認真慘情。依家距離立法會換屆仲有一年，要候選人咁早承認會出嚟選肯定冇可能，只不過功能界別議席選情一向相對較穩定，點都唔會好似許華傑講得咁波譎雲詭啩！