政情：銀河渡假城玩東南亞風情

致力打造亞洲拉斯維加斯嘅澳門，賭業同酒店業都相當蓬勃，尋日「澳門銀河」綜合渡假城正式開幕，身為銀河娛樂副主席嘅呂耀東無懼競爭，佢覺得百花齊放，有利大家可以一齊做大個餅，個餅大咗，自然每個經營商都可以賺到錢啦。不過，澳門銀河喺設備方面確係有過人之處，躋身喺咁多賭場同酒店之中，一啲都唔輸蝕。

澳門銀河尋日正式開幕之前，已經有人山人海喺門外等入場。開幕禮前嘅記者會，銀河娛樂副主席Francis呂耀東同爸爸嘉華集團主席呂志和一齊現身，詳細介紹成個渡假城嘅設備，包括號稱全球最大嘅空中衝浪池，面積達四千平方米，人造浪最高去到一點五米，仲有用三百五十噸白沙鋪成嘅人造沙灘，面積超過二千平方米。主題好明顯，就係東南亞風情。全部三間酒店，提供房間超過二千二百間。

同行未必如敵國，身為澳博董事嘅賭王四太梁安琪尋日盛裝出席撐行家場，依家喺澳博舉足輕重嘅四太話唔怕有競爭，因為良性競爭係好應該嘅。佢好同意Francis所講，希望港澳可以合作，旅客喺香港玩完，就可以過澳門玩多幾日。