政情：肥彭靠內鬼擸BBC筍工

末代港督彭定康打「超級筍工」，做英國廣播公司（BBC）信託主席，呢個月正式上任，但對佢嘅種種質疑仍然未止，最新有報道踢爆遴選委員之一嘅前英國石油公司（BP）行政總裁布朗，原來同肥彭有千絲萬縷嘅關係，有唔少共同利益，其中兩個人更因為同屬首相卡梅倫嘅對外推廣商貿智囊，肥彭因而可以提早面試，難免令人懷疑可能對其他應徵者唔公平。

英國《每日郵報》報道話，肥彭同布朗關係密切，首先布朗手上估計持有價值逾千萬英鎊嘅BP股份，肥彭做新工前就係BP董事局受薪成員，而兩個人都係牛津大學聖安東尼學院校友，又係首相商貿智囊團成員，另外肥彭副手近期仲同布朗一齊檢討高等教育撥款添。由於兩人都係首相智囊，就喺面試前八日，兩人喺唐寧街十號首相府飲咗餐茶，畀肥彭有機會提早面試，益晒佢。

報道質疑當局點解一直冇公開兩人關係，又引述一名唔支持肥彭做主席嘅遴選委員，話肥彭見工時講明認為BBC冇嘢需要改變，諗住無為而治，請一個咁嘅主席根本係一種倒退！