政情：沈祖堯和稀泥拆彈

最低工資嘅爭議殺入大學校園！香港中文大學嘅飯堂分別由大學同書院各自組成嘅管理委員會管理，呢個由師生組成嘅委員會，會負責監察飯堂承辦商嘅服務質素同運作係咪合乎標書要求，而喺最低工資實施後，承辦商就同員工制訂咗新合約，班學生哥就好緊張班工友嘅福利問題，仲喺校園飯堂拉起橫額，抗議飯堂承辦商同員工重新簽訂合約，要為員工爭取埋有薪飯鐘同休息日咁話。

點醒 食得鹹魚抵得渴

校長沈祖堯當然明白星星之火可以燎原呢個道理，所以佢急急出嚟撲火。佢喺上個禮拜六發表最新網誌，話依家法例存在唔清晰嘅地方，都唔知休息日係咪要計算落人工度，又話承辦商同員工重訂合約都係為咗釐清雙方責任同義務，避免將來出現爭拗，學校會確保承辦商符合畀工友最低時薪為二十八蚊嘅法例規定。

沈校長又話，飯堂嘅承辦商多數都係中小企，最低工資實施要加人工已經搞到人哋成本增加，如果計埋有薪飯鐘同休息日會令佢哋經營困難，到時同學仔就要面對飯堂食物加價。佢提醒班同學仔應該多角度思考，要明白事情往往唔係非黑即白，應該平衡各方利益，又呼籲班同學仔，依家企出嚟幫工友爭取，到時萬一人哋真係加價都要體諒同支持。

講到咁白，沈校長都係想提早點醒班學生哥，到時要食得鹹魚抵得渴，到時咪又抗議飯堂加價呀！

提點還提點，沈校長都呵住班學生嘅，佢喺網誌中不忘讚佢哋見義勇為，為基層員工發聲，佢好開心見到同學仔咁積極參與喎！佢仲話校方都願意行多一步，適度下調行政管理費，仲會設立電話專線協助外判員工解決最低工資糾紛添！