政情：搞搞政：邱副局長悶親80後
富貴黨青年團近期興蒲吧論政，日前又去摸酒杯底談論時事，席間仲有喺上次聚會甩底嘅運輸及房屋局副局長邱誠武。
邱副局長一場嚟到，青年團成員當然就住香港房屋政策問題發炮啦。咪以為現場個個都係專業人士就冇住屋煩惱，有成員同邱副局長反映，話近年樓價真係升得好快，令到大部分香港人生活質素下降，所以想知政府有乜長遠政策同解決方法；亦有人要求加強「置安心」計劃。
點知邱副局長大派悶蛋，只係不斷重複過去嘅爛觀點，講咗等於冇講，又話當局會研究大家意見云云。聽完佢呢番說話，相信班青年團都好冇癮。
我哋喺現場見到唔少「80後」，除咗大家熟悉嘅富貴黨「鍾嘉欣」歐銘絲同方亮瑜外，仲多咗位靚女黨員曾肖婷，佢今年就大學畢業，聲言遲啲考完試就會積極參加黨內活動。莫非佢有興趣參加年底區議會選舉？