政情：維園阿哥搵老竇造勢

「維園阿哥」任亮憲捲入非禮強姦案而搞到一身蟻，被迫打消出選年底區議會選舉嘅念頭，甚至絕迹佢嘅發迹地「城市論壇」，但佢對從政似乎仍未死心，日前出席所屬政團「人民力量」搞嘅長者佛誕素食宴，負責幫手搞氣氛，仲搵埋經已離開本港政壇多年嘅老父、前立法局議員任善寧出山，為有意參選區議會嘅黨友造勢，成為全場焦點。

任善寧退出政壇後即移居美國，近年已甚少在港亮相，即使阿仔任亮憲早前喺「城市論壇」鋒芒畢露、及至後來捲入強姦案，任善寧亦未有高調露面，更唔好講話出席以前社民連嘅活動。睇番佢出席素食宴嘅相，不但原來嘅一頭黑髮白咗大半，身形更係肥咗成個碼，差啲認佢唔到。

任善寧出席人民力量搞嘅地區活動，都算係幾畀面，莫非佢想利用自己嘅知名度同舊有嘅關係，喺班長者面前幫個仔洗洗底、為將來重返政壇鋪路？任亮憲當日亦特意着咗件印有「低調」兩字嘅T恤，但着喺佢身上令人覺得係講緊反話。