政情：黃子欣諗計反擊iPad

iPhone同iPad嘅面世，改變咗好多人嘅生活習慣，連幾歲嘅細路都貪佢哋「樣靚聲甜」，於是成日攞住嚟玩，以往被認為益智嘅兒童電子玩具就放埋一邊，做呢行生意嘅偉易達惟有改變思維，睇住呢啲產品嚟打。

偉易達CEO黃子欣話家陣面對平板電腦同智能手機嘅競爭，真係好難做，因為佢哋嘅遊戲非常多，吸引埋幾歲嘅小朋友。根據佢嘅觀察，細路仔有個特性，家長有乜佢哋又要有乜，最慘係好多家長鍾意攞部iPhone或iPad出嚟等啲細路收聲，唔使嘈住晒。

為咗爭番呢個市場，佢度咗條橋，就係將大人玩嘅嘢，變為細路仔版本，好似V.Reader，其實係Kindle嘅小童版；今年秋季就會出InnoTab，實情係兒童版嘅iPad，呢款產品有齊晒輕觸鍵、多媒體功能同可以下載Apps，仲可以畫吓公仔；而MobiGo呢款玩具，就同智能電話差唔多。

喺度橋前，佢同埋班手足做咗唔少功課，甚至諮詢埋專門研究兒童習性嘅專家。佢又發現美國同中國大陸，對兒童玩具應有功能嘅諗法有好大差別，美國認為樂趣同學習功能應各佔一半，而中國就認為係5%同95%分。