政情：工聯三子打虎博曝光

選舉臨近，各政黨為爭加曝光率各出奇謀。尋日政府調整全年通脹預測增加一個百分點，提高到百分之五點四，係人都知通脹猛於虎，如果議員有方案打虎，肯定流芳百世，但要做武松攞選票唔容易，騎劫爭曝光反而更輕鬆。

好似建仔嘅漁農界議員「肥根」黃容根喺下禮拜三動議辯論「減輕食品通脹對巿民的影響」，議案針對奶粉、漁農產業、增加食材供應來源、加強內地同日本食品檢測、提升公眾街巿功能、防止不法商人囤積居奇，同埋透過「關愛基金」等途徑，支援基層巿民抗通脹等。

分途戰立會地區直選

出得議案，就預咗畀人修正，而喺五個修正議案中居然有三個嚟自工聯會。新界西嘅「阿王」王國興做前鋒，話要全面檢討公眾街巿政策，再嚟勞工界葉偉明上陣話要喺全港母嬰健康院設立專櫃售賣奶粉，跟手勞工界潘佩璆再抽多嘢，提出考慮向綜援戶、低收入人士同清貧長者等人士提供額外食物津貼或者食物券，仲話要為清貧學生提供廉價午餐。

真理係愈辯愈明，提出修正冇話唔畀，但係今次佢哋三兄弟提出嘅項目完全唔同，點解唔事先溝通好晒，搵一個代表提晒呢？依家要投三次票，唔通呢排立法會好得閒？以前都有政黨試過搵兩個議員修訂原議案，無非係擔心一個脫腳的話有另一個補上，但今次唔多似喎！

佢哋三兄弟喺二○一二年都有意參與立法會地區直選，首先阿王梗係想喺新界西競逐連任啦，而葉偉明同潘佩璆就會轉戰新界東同港島，所以佢哋今次搶住打虎，可謂司馬昭之心，路人皆見，睇嚟都只係為博取曝光率啫！