政情：鼠王芬亂噏舜禹係父子
專業會議三名立法會議員何鍾泰、劉秀成同梁美芬，連同一批主要嚟自建築同工程界嘅專業人士成立咗個新組織，呢個名為「大舜政策研究中心」嘅團體仲搵嚟政壇元老、前行政會議召集人「大Sir」鍾士元擔任顧問。不過被問到個組織嘅名，擔任副主席嘅梁美芬（鼠王芬）卻衰咗。
點解個組織會以中國古代嘅大舜為名呢？主席何鍾泰透露個名係由大Sir改嘅，因為研究中心主打工程同規劃議題，最初諗住用出名治水嘅大禹，但又覺得唔多好聽，於是就改用將帝位禪讓畀大禹嘅大舜。
鼠王芬之後就補充，話研究中心第一炮就係講測試水質，而大舜又係大禹嘅爸爸，所以覺得好合適。吓？既然講得係禪讓，大舜又點會係大禹嘅阿爸呢？咁就變咗係世襲啦！翻查歷史，大禹嘅爸爸應該叫做鯀，因治水無方畀大舜殺咗。
鼠王芬（右）講法律就叻，不過似乎要惡補中史嘞。