政情：搞搞政：鬍鬚曾舊橋講升級衰硬

中國社科院早前公布嘅調查批評本港科研實力不足，競爭力已難敵內地部分大城市。尋日，特區政府就由財政司司長鬍鬚曾領軍，喺廣州搞咗個名為「升級轉型香港博覽」嘅展覽會，向內地城市推介香港嘅升級、創新能力。不過，投資推廣署隨即展開嘅宣傳卻係以金融、人民幣離岸等為主，鬍鬚曾口講升級，做嘅卻係舊橋，咁樣升級真係好容易摜一鋪噃！

呢個展覽會尋日喺廣州市錦漢展覽中心舉行，鬍鬚曾致詞時好開心咁推介本港嘅創新科技，仲話○九年創新科技嘅產值高逾百億元，香港更畀歐洲工商管理學院喺「全球創新指數」中列為第三位。佢一味講威水史，完全當社科院啱啱批評香港科技及研發實力不足冇到。

最搞笑嘅係，鬍鬚曾呢頭無視社科院嘅調查，嗰頭中央政策組喺香港搞嘅一個研討會，首席顧問劉兆佳卻對社科院一個學者呼籲本港放棄奉行多年嘅「積極不干預」政策好上心，煞有介事咁話港府早喺過去二十年已經冇再提。特區高官一陣扮聾耳陳，一陣又撲出嚟反擊，真係一時一樣，人格分裂。