政情：葉劉南海祖屋執靚靚

香港有唔少南海人，香港南海同鄉總會前晚舉行就職典禮，就喺灣仔會展搞咗六十三席嘅盛會，新民黨主席葉劉淑儀都有出席。九六年擔任南海區榮譽巿民嘅葉劉話，佢都有深厚嘅家鄉情意結，雖然唔得閒返去，但都將祖屋執到靚一靚，平時就搵堂哥幫手睇住。

立法會議員林健鋒亦係南海人，佛山武術風氣鼎盛，佢嘅爸爸林亮就曾經喺家鄉習武，年屆八十七歲嘅林亮尋日喺會場好精靈，佢話自己一世人活得開心自在，冇樹敵亦冇仇人，呢啲同佢當年返南海學武有直接關係。

佢仲記得師傅喺武館掛咗一對對聯：「克己讓人非我弱 全心守道任他強」，呢個係佢師傅嘅做人哲學，林亮當作自己嘅座右銘，即使後來林亮嘅師傅喺香港授武遇人挑戰，佢都「任他強」，唔同人比試。嚟緊林亮仲會帶一百名中學生返南海交流，佢慨嘆時下年輕一代受唔到苦好難教，所以想帶佢哋返去體驗吓喎。