政情：滬百大富豪姚明最年輕

內地富翁人數激增，尋日出爐嘅胡潤上海財富白皮書，更透露上海市富翁多，每175人就孕育出一個千萬富豪，有千萬元身家嘅有13.2萬人，比去年多8.2%；至於億萬富豪有7,800人，比去年增長6.8%。調查仲發現，呢批千萬元以上嘅富豪平均年齡只係39歲，姚明更成為百大富豪榜中最年輕嘅一個，以10億元身家排第94位。

喺呢個富豪榜上，三大首富分別係東方希望嘅劉永行家族、世茂房地產嘅許榮茂家族，以及服裝品牌美邦集團嘅周永健家族。排頭兩位嘅劉永行、許榮茂，坐擁嘅資產分別為350億元（人民幣．下同）同330億元。

胡潤百富創辦人兼首席調研員胡潤就話，上海有咁多千萬富豪，全拜經濟同地產嘅快速發展，佢話上海嘅GDP增長高達9.9%，房價上漲，高檔樓房嘅價格漲幅更驚人，按年上漲21%。不過，億萬富豪身家暴漲，除咗炒樓炒股外，仲有人因為藝術品收藏同投資老洋房等。