政情：蔡瑩璧怕捱病拒復出
商務及經濟發展局前局長劉吳惠蘭辭職一個月，政府到家吓都搵唔到人接班，搞到商務及經濟發展局嘅工作好似煞停車咁，只靠慢慢溜。傳聞中大熱人選、即該局前常秘蔡瑩璧前晚再一次否認會出山，點都唔肯接個燙手山芋。
政圈知情人士話，蔡瑩璧前晚喺一個政界飯局重申唔會出山，佢話自己身體冇乜事，但擔心做局長後壓力會令身體變差，思前想後都係決定唔會復出，即係話煲呔曾即使親自出面都要食檸檬。
鬼叫呢個局上一個局長馬時亨做到腦有事，臨陣換將又只係做咗兩、三年，家吓又嚟個腸癌。下一個會點？冇人知㗎噃，所以呢個燙手山芋咪冇人啃囉。
蔡瑩璧（右）再次否認出山，點都唔肯接任劉吳惠蘭（左）商務局局長個位。 （資料圖片）